نیشنل ڈیٹابیس اینڈ رجسٹریشن اتھارٹی (نادرا) نے شہریوں کی سہولت کے لئے جدید ترین پاک آئی ڈی موبائل ایپ متعارف کروا دی جس کے زریعے اب ہر پاکستانی شہری شناختی کارڈاور فیملی رجسٹریشن کارڈ گھر بیٹھے بنوا سکیں گے جنہیں نادرا دفاتر جا کر لمبی قطاروں میں انتظار کرنے کی زحمت نہیں اٹھانا پڑے گی۔
زرائع کے مطابق پاک آئی ڈی موبائل ایپ میں دستاویزات کی شناخت کا نظام اور بائیومیٹرک تصدیق کی سہولت دی گئی ہے جس کی بدولت ہر پاکستانی شناختی دستاویزات بنوانے کی کارروائی میں پیش آنے والے تمام مراحل اپنے موبائل فون کے ذریعے ہی مکمل کر سکیں گے، مثلاً ضروری دستاویزات اپ لوڈ کرنے کے ساتھ ساتھ تصویر اور فنگر پرنٹس بنا سکیں گے اور ڈیجیٹل دستخط بھی آن لائن درخواست میں شامل کر سکتے ہیں۔
زرائع کا کہنا ہے کہ یہ موبائل ایپ تمام پاکستانی شہریوں کے لئے بے پناہ سہولیات مہیا کرنے کا باعث بنے گی اور نادرا کی کامیابیوں میں بھی ایک نیا اضافہ ثابت ہو گی جس کی بدولت پاکستان دنیا کا پہلا ملک بن چکا ہے جس نے ایک سے زیادہ بائیومیٹرک لینے اور دستاویزات جمع کرانے جیسی سہولیات آن لائن متعارف کرا دی ہیں۔ اس ایپ کی تیاری میں “کنٹیکٹ لیس ٹیکنالوجی’’ کا استعمال کیا گیا ہے جس کی بدولت شہری سمارٹ فون کے ذریعے شناختی دستاویزات بنوا کر جدید ڈیجیٹل سہولیات کا بھرپور فائدہ اٹھا سکتے ہیں۔اس لئے شہری اس ایپ میں دئیے گئے سروے کے ذریعے اپنی مفید آرائ سے آگاہ کریں گے۔
